Hyperthreading technology

Tunlaiah 'Hyperthreading technology' a lar a, a awmze hre lo pawh kan la tamin a rinawm. Mahse, he post chhiartu hi chuan kan hrethiam vek tawh ang.

Hyperthreading kan tih chuan hriatthiam phawt tur thil pahnih a awm a. Chungte chu :-

1. CPU Core (Physical): Processor kut leh ke ber a ni a, CPU-in a hnathawh tur ber (process) lo sawngbawl a, hna lo thawksaktu tihna a ni. CPU-ah hian a bet a, amah hi 'physical core' tih a nih avangin hardware a ni bawk tihna a ni.
   
   
2. Thread (Logical): Tuna kan sawilai hi hardware thread a ni a, hardware thread kan tih hian hardware tak tak a ni tihna a ni chuang lo va, Thread chu CPU Core kut leh ke ber a ni a, Core hian a hnathawhna ber atana a hman chu thread hi a ni. CPU-in process a run dawn chuan thread a hmang thin. Logical core tih te pawhin an sawi thin tho va; CPU core hian thread an nei theuh thei tihna a ni. Thread leh Core hi ngaihpawlh awl deuh mai a ni.
   
   (Software thread a awm leh a, hardware thread lo zawk a ni a, an danglamna chu software thread chu process peng khat a ni ve leh thung a, process in thread pakhat aia tam an nei thei bawk. Process nen inanna lai an nei ve leh a: Thread chu a zan em avangin light weight processes tih te pawhin an sawi thin tho a ni.)

Aw le, tunah chuan Core (physical) leh Tread (logical) danglamna kan hre tawh bawk a, khiti ang thil thui chhiar reng chu a ninawm tawh ang. Hyperthreading awmzia luhchilh tawh ang aw.

Hyperthreading: 

                       Hyperthreading chu feature pakhat a ni. Tunlaia processor chhuak thar Intel leh AMD ten an siam tam tak hian hyperthreading technology an support nual tawh a ni. A thil tum ber chu, Processor-in chak leh rintlak zawka hna a thawh theih na'n a ni. Hyperthreading support processor-ah chuan CPU core tinte hian anmahniin hardware thread (logical) pahnih theuh an nei hrang vek a, thread a lo tam na na na chuan process pawh hnehsawh takin a la zel ang a; CPU chu a lo chak phah ta em em a ni. Hyperthreading support lo, CPU core neih zat inang chiah processor ai chuan a let deuhthawin a chak zawk tihna a nih chu. A nih chuan Hyperthreading-ah chuan core tinte hian process pakhat aia tam an la thei tihna a ni a; core tinte hian thread pahnih zel an neih dawn avangin. Thread chu process run-tu ber a ni si a; Processor Hyperthreading support lovah erawh chuan core tinte hian process pakhat zel an la ang; core tinte hian thread pakhat theuh an neih vang a ni.

Entir na'n: Kan Processor (Hyperthreading support) hian Core pahnih (Dual core) lo nei ta se, chung core-te chuan kut (hand/thread) an nei theuh angah lo ngaihruat leh ta i la. Hyperthreading a support si chuan core pahnihte khan a hranin thread an lo neih belh ve ve ang a; kut pakhat an neih belh ve ve dawn tihna a nih chu (A chhan i hriatchian loh chuan Hardware thread khi lo chhiar nawn leh mai rawh). A nih chuan kan processor core-te chuan kut pali an nei tawh ang a, kut pahnihin hna an thawh theih ang deuhthaw kha kut pahnih dang lo awm belhte chuan hna an lo thawk thei ve leh ang. Processor chak tha tak kan neih phah dawn tihna a nih chu.

Hriat tur atana pawimawh em em erawh chu, hyperthreading hian Thread (logical) a neih belh avang hian physical core ngah zawk CPU-te hi a tluk pha tihna a ni kher lo. Entir na'n: Dual Core Hyperthreading support chuan thread pali (Physical core 2 in Logical core 4 aka hardware thread an nei) a nei a, Quad Core Hyperthreading support ve lo hian core pali (Physical 4) tho a nei ve leh bawk. Core tinte chuan thread (logical) pakhat theuh an nei a, hyperthreading a support loh vangin logical thread an neih belh tawh lo. Nimahsela, Core tinte hian thread pakhat theuh an nei ve tho va, chuvang chuan, core pahnih nei a, thread pali nei ai chuan, core pali nei mahni theuhva thread pakhat nei hrang CPU hi a chak zawk a ni.
 CPU clock speed inang reng siah chuan Quad core hyperthreading support lo hi a la chak zawk tho tihna a nih chu. Chuti ang zelin, dual core ro rovah pawh hyperthreading support chu a chak zawk tihna a ni.

He post hi i hlawkpui a nih chuan i thiante hnenah share hreh lo la. Zawhna i neih a, hei aia tha suggest duh i nei a nih chuan comment lamah i rawn tuihnih mai dawn nia.

Ka lawm e.