32-bit vs 64-bit Computer/Phone

                          32-bit tih leh 64-bit tih hi kan lo hre fo tawh țhin ang a. An inang lo tih te, 64-bit a chak zawk tih te pawhin kan lo hre hrang nual tawh ang. Amaherawhchu, heng a hnuaia mite hi hrechiang lo kan la awm thei tlat.

- Engti ang chiahin nge an danglam?
- Eng hi nge danglamna thlentu ber?
- Engti ang chiahin nge an inthlauh?
- I computer hman lai mekah khan eng hi nge a țhatpui zawk ang?


                       Tunah erawh chuan, kan hrethiam vek tawh ang. Tuna kan topic-ah hi chuan, processor chungchang kan sawi a ni tih kan hre țheuh dawn nia. A hmasain hengho hi hrethiam phawt teh ang :-

A tlangpui:

                         32-bit leh 64-bit kan tih hian CPU (computer processor) kan sawina a ni. Tun hma kha chuan, 64-bit CPU hi a la awm ngai lo va, AMD chuan 22 April, 2003 khan 64-bit CPU an rawn siamchhuak ta a, a hmasa ber niin a hming chu  'AMD Opteron' tih a ni. 64-bit CPU hi Intel 64 (x64) leh AMD64 tiin an then hrang thin a. Tunlaiah erawh chuan, CPU-te hi 32 leh 64 bit an support kawp vek tawh a (x86_64); Operating system kan install-ah hian a innghat tawh. Smartphone-ah ve thung chuan Apple hovin 20 September, 2013 khan iPhone 5s an release a; smartphone bikah 64-bit CPU an rawn siamchhuak hmasa ber ve thung a ni.

Binary number: Number pahnih: 1 emaw, 0 emaw tihna a ni. (0 or 1)

Bit: Binary number sawina tho a ni a, CPU architecture bikah chuan memory address a binary number (length) awm thei zat sawina atan hman a ni.

Entir nan: 8-bit kan tih chuan, Binary number (1 or 0) hi digit riat a support tihna a ni a; 01010101 hi 8-bit binary number a ni tihna a ni. Tuna kan topic-ah hi chuan 8-bit memory address tihna a ni ve thung.

Memory address: Memory kan sawi hian tun țumah hi chuan, RAM kan sawi tihna a ni. RAM chhunga thil awm reng reng hian memory address an nei țheuh va; RAM chhunga khawilai tak ah nge a awm tih a hriat theih dawn tihna a ni. Memory Address value hi a 'bit' a san chuan value a load sang thei tihna a ni a; RAM-ah hian vawi khatah application lian zawk a load theih dawn tihna a ni.




AN DANGLAMNA (DIFFERENCE):

1.  64-bit CPU kan tih hian processor chhunga components hrang hrang awm ho -- Memory address, Registers, Address bus, Data bus, integer size, data path widths leh a dangte hian, 64-bit virtual memory address (Eight-Octet) (2⁶⁴) an hmang tihna a ni. 32-bit CPU-ah ve thung chuan he'ng ka thil sawiho hian 32-bit virtual memory address (2³²) an hmang tihna a ni ve leh mai.
2. Memory address atan 64-bit kan hman si chuan, Data value sang tak a la thei tihna a ni a; vawi khatah application lian tak a load thei tihna a nih chu! 32-bit memory address a nih ve leh thung chuan, 64-bit-in data value a load theih chanve vel a load thei tihna a ni a; vawi khata application a load theih zat kha 64-bit ai chuan a hniam fe zawk tihna a ni.
3. Windows OS bikah chuan, 32-bit kan hmanin, Windows hian RAM hi 4 GB (3.48 GB actual) thleng chauh a hmu thei a ni. A chhan chu, RAM chhunga address a neih theih zat chu 4 GB tihna a ni a. A chawhchhuah dan chu:
   2³² bytes = 4,294,967,296 bytes = 4,194,304 Kb = 4096 Mb = 4GB 
   
   64-bit ah ve thung chuan RAM hi 16.8 million TB vel a thleng a hmang thei ve leh thung. A chawhchhuah dan chu:
   2⁶⁴ bytes=18,446,744,073,709,551,616 bytes = 18,014,398,509,481,984 kb = 17,592,186,044,416 Mb = 17,179,869,184 GB = 16.8 million TB approximate.
4. Point no.3 hi han en leh lawk i la, hetah tak hian Windows OS siamtu lam Microsoft ho hian thluak an rawn hmang ve leh zeuh thung a. A hnuaia ka tarlan ang hian Windows Edition tinte hi 64-bit ni mah se, RAM support theih chin an nei ve leh vek thung a ni. Windows 7 bikah sawi ta i la.
   
   Windows Starter -                 8 GB
   Windows Home Basic -        8 GB
   Windows Home Premium - 16 GB
   Windows Professional -    192 GB
   Windows Enterprise -        192 GB
   Windows Ultimate -           192 GB
   
   *Linux leh Apple Mac OS X bikah chuan limit a awm ve lo.
5. Kan hriat reng tur chu, 64-bit Operating system-ah chuan 32-bit application a run theih vek a (Memory address-ah a len vek avangin), 64-bit application erawh hi chu 32-bit Operating system-ah a run theih loh ve thung (32-bit memory address ah 64-bit application hi load turin memory address-ah a leng tawh lo a ni.)
6. Windows OS 32-bit hian virtual memory bik atan 4 GB thleng a support a, 64-bit erawh chuan 16 TB thleng a support ve thung.
   Paging file bikah 32-bit hian 16 GB thleng a support a, 64-bit erawh chuan 256 TB thleng a support ve thung. System cache memory bikah 32-bit-in 1 GB thleng a nei thei a, 64-bit erawh chuan 1 TB thleng a nei thei ve leh thung.

I computer hmanlaiah khan 64-bit OS hi load chi a ni em?

- A tawi zawngin sawi ta mai i la, keima mimal ngaihdana 64-bit OS load nana pawi lo chin chu khu'ng a hnuaia point khu i neih kim theih chuan a ni:-

• I computer-ah khan 64-bit CPU (processor) i neih chuan.
• RAM 4 GB tal (I processor a chak tha a, i clock speed a sang tha a nih chuan).
• RAM 6 GB chin chunglam i hman chuan.

A chunga mite khi i khawlin a phak vek loh chuan, 32-bit OS hmang zawk la, i tan a tha zawk ang.

He post hi i hlawkpui a, i hrethiam a nih chuan midang hnenah share hreh lo la, hei aia tha zawka tih dan hria kan awm chuan khawngaihin comment lamah kan sawi dawn a nia.

Ka lawm e.